港澳辦新揸fit人王光亞形容香港係本好難讀得通嘅書，為咗睇通睇透呢本書，王光亞近日頻頻搵人上京「伴讀」，日前召咗中央政策組話事人佳叔上京，噚日輪到環境局局長邱騰華，《南華早報》董事總經理郭惠光噚日則獲王光亞單獨接見，《南早》中人都幾驚訝，唔知太子女有冇交代舊年胡錦濤變胡佳單嘢？
叫謝偉俊唔好從政
八方相信王光亞有睇香港報紙，至於關於香港嘅書，京官未必有時間睇啩。幾日前王光亞南下深圳與建制派議員見面，旅遊界議員謝超人（謝偉俊）送咗本書畀王光亞，並唔係政治、經濟巨著，而係號稱好多人期待嘅李居明《兔年通勝》。
據謝超人稱，王光亞收到本書後不時揭開看看，似乎十分好奇，佢相信王光亞應該冇睇過呢啲術數運程書。香港人十分迷信，因此呢啲風水玄學書籍十分暢銷，京官共幹想睇通香港民情，睇吓呢啲大迷信勁八卦書籍，或者有啲領悟。
根據李居明批算，隨新政府總部落成，特首煲呔今年有運行，不過一口多就出事。至於大陸方面，佢建議胡溫喺主席、總理辦公室內掛幅貓畫，就可以挽救運勢咁話。謝超人話唔知道王光亞有冇睇到李居明指點並上報中央，不過佢自己與李居明認識多年，好鬼信佢，李居明曾贈幾句勸佢唔好從政，因為在香港搞政治吃力不討好，家陣中晒！
李居明身家億元計
然而李居明最令謝超人佩服嘅唔係術數，而係做生意，謝超人指李居明搞marketing最拿手，目前身家以億元計。李居明財來自有方，與哨牙通比較，唔知邊個先係高人？不過睇風水幾準幾靈驗都好，京官可能都不以為然，因為共產黨人係無神論者，拜金多過拜神。
在中國共產黨領導之下，香港人迷信風水十分多餘，事關主吉主凶、福祿財位皆在北方，凡事向北望實冇衰，好多人話風水救港，實情係北水救港，風水佬呃你十年八年，京官話過你聽井水不犯河水，否則點睇風水都冇運行。
mailto:[email protected]