北歐女神　飛一般回歸

北歐女神　飛一般回歸

從前諸神開派對，揸嘅係名貴豪房。某日，北歐女神伊登Idun唔記得入P波，架集頂尖科技及裝備嘅SAAB9-5流落凡間，從此紳寶得以重現人間。我講爛gag，但廠方絕非講笑，由馬力到設備，可謂擺晒最耍家嘅嘢落新車，高調回歸。

記者：徐影龍
攝影：譚盈傑
Model：Haidy@GMEModels

內外大玩飛機概念

數吓手指，SAAB9-5已經好多年無轉款，亦漸漸被港人遺忘。當年由製造飛機到汽車，紳寶紅極一時，可惜母公司因財政問題，不但無能力再研發新車，廠方仲揚言再無人出手，紳寶將從此絕迹車壇！好彩近年由同樣造飛機聞名嘅荷蘭超跑品牌Spyker買下，大力改革推陳，有如北歐女神伊登（Idun）施行回春魔法，將9-5重新注入生命力。
呢架瑞典名牌，多年後再ShowQuali，將300匹辣跑馬力，悄悄融入豪房，賣相及內櫳仍鍾情飛機概念，由車頂至AB柱，均滲入機艙設計，前後擋風玻璃大角度傾斜，打橫睇有點像小型飛機駕駛艙。車尾造型不算複雜，但仍具立體層次感，一條由左拉至右嘅超長Brake燈，實在相當醒目搶眼，而輪圈更用上具紀念價值嘅渦輪風葉設計。整體感覺係穩重高級以外，帶有無限活力，全新9-5改動得相當討好。

■特大鬼面罩同下方氣壩，令車前造型極具氣派。

■19"多輻式輪圈，造型來自飛機渦輪風葉。

■加入免匙系統，遙控薄薄一片，靚到爆。

■尾燈同Brake燈橫貫車尾，超長紅燈相當搶眼。

豪房都飆得起

座艙大玩飛機概念，除軚環之外，中控台帶有高科技感，連三圓錶板指針、中控台屏幕、門柄拉手LED等，均用上標誌飛機駕駛艙嘅綠色。我極Buy投射式錶板，新9-5玩得仲勁，其Head-upDisplay包含速度、引擎轉數、燈號，仲可上下調校高度，唔同人坐上去，一樣可校到啱睇為止。乘坐感夠豪華舒適，性能表現有驚喜。到港型號有兩款引擎，今日試嘅屬頂級2.8LV6Turbo，馬力有300匹，儘管車身紮實令車重增加，但雄渾馬力搭夠，令呢部豪房起步加速依然爽快起勁，加上XWD全時四驅及六速+/-波箱，0-100km/h為6.9秒，狠劈起嚟一樣好癲。
平心而論，新9-5C/P值相當高，以全車用料、設備及性能嚟講，六十幾萬絕無收多你，欠嘅只剩品牌效應，能否重現當年紳寶熱潮，要睇港人買車情意結有幾重喇！

■中控台同波棍位延伸至後座，好似飛機獨立座艙般。

■三幅式軚環造型更為時尚，軚感亦相當不俗。

■三圓錶板用上綠色指針，比傳統紅、藍色別具風格。

■投射式錶板可調校高低角度，極之體貼。

■波棍位近乎直立式，轉波時零舍有型過人。

■後座闊落空間屬賣點之一，同級車中數一數二。

SAAB9-5AeroTurboXWD

引擎： 2,792ccV6Turbo
馬力： 300bhp/5,500rpm
扭力： 400Nm/2,000rpm
傳動： 6速+/-波箱四驅
售價： $648,000
查詢： 27608668（合朗汽車）

■車頂前後大幅度傾斜，令豪房帶有Coupe流線美感。