【本報訊】當港澳辦主任王光亞也對前學運領袖王丹來港祭華叔口氣放軟，大有開綠燈之意，前全國人大常委曾憲梓卻口出狂言，指王丹經常反對祖國兼搞政治活動，擔心擾亂特區穩定，力促特區政府禁止王丹入境，華叔愛徒、民主黨張文光狠批曾憲梓「極不人道」，李卓人更斥曾憲梓對華叔不敬，「唔該佢收聲」。記者：許偉賢
經常語出驚人的曾憲梓昨日出席公開活動再度發表謬論。他先表明不清楚中央政府是否出手阻撓王丹等民運人士申請來港弔唁司徒華，繼而便強調個人認為特區政府不應該批准王丹來港，理由是王丹經常反對祖國，又大搞政治活動，擔心他會擾亂特區穩定，「嚟香港搞是非」。他更指王丹一旦來港會成為先例，「將來唔應該嚟嘅人都可以嚟」，力促當局避免立此先例。
「對華叔係侮辱」
港澳辦主任王光亞早前指特區政府會「很好地」處理王丹事件，反映中央並未關上大門，反而曾憲梓力主「落閘」，惹來泛民主派狂轟。
民主黨立法會議員張文光直斥曾憲梓「極不人道」，指王丹來港唯一目的只是參與華叔的安息禮拜，「佢唯一要去嘅地方就係聖安德烈堂，鞠個躬、獻朵花，仲提出咗四不承諾，如果佢（曾憲梓）咁都話唔畀佢嚟，係好唔人道」，諷指：「如果去靈堂致祭都係反中罪名，咁反中真係無處不在。」
身兼治喪委員會成員的支聯會代理主席李卓人也指摘曾憲梓將華叔喪禮變成政治活動，「咁對華叔係一個侮辱，係極為不敬」，強調王丹已經主動提出四不政策，「證明佢唔會有任何活動，但曾憲梓就屈佢嚟香港搞政治活動，唔該佢收聲啦！」
令人有無謂猜測
由於曾憲梓的言論與中央意向相違，難免令人質疑他是否代替中央發聲，李卓人稱「究竟佢呢個講法係為中央早前嘅正面訊息降溫，抑或係佢自己純粹亂噏？無論點都會令人產生好多無謂猜測。」
建制派陣營對這位左派元老的謬論未有讚好，也沒有開腔力撐，只強調要尊重各人言論自由。民建聯主席譚耀宗重申事件要由入境處按情況處理，工聯會黃國健更指：「佢（曾憲梓）成日都講大咗；老人家講嘢，大家唔使咁認真。」