自由黨始終星味十足，已退黨嘅方國珊飾演哪吒聞名，八方收到風，十幾年前出道，曾與張衛健、丁子竣同王韻嬋合唱《超越巔峰》嘅歌星林漢揚，最近忽然加入自由黨，由樂壇踩入政壇，投身比娛樂圈更光怪陸離嘅政治圈。
公關製作公司老闆
據知林漢揚由相熟黨員推薦入黨，離開幕前多年，林漢揚現時係公關製作公司老闆。不過熟識佢嘅人同八方講，林漢揚好關心時事，平時與朋友飲嘢吹水，可以滔滔不絕發表意見，對政治表現得好熱心，因此搵佢入黨可以話係一拍即合。
黨內人士指林漢揚暫未表態有興趣出選，而本年區選在即，林漢揚亦未必準備好去馬。話雖如此，有心參選可以惡補上陣，自由黨創黨主席李鵬飛呢幾日會為黨員補課，傳授做地區工作直選心得。飛哥教路能否重振自由黨係未知之數，才子陶傑據稱亦有為自由黨員上課，指點應付傳媒技巧，有自由黨員大讚好嘢，同睇專欄、聽電台節目一樣咁精采。