蘋果iPhone4推出逾半年依然大把人搶購，16GB版本原價4,988元，竟然炒到7,200元，無非供不應求。八方屈指一算，蘋果官網已經停售iPhone4超過一個月，近日官網無端端多咗一句溫馨提示：「iPhone4訂購限額：每名顧客1台」，搞到炒家人人唉聲嘆氣。
雖然iPhone4仲未有得賣，但蘋果事先張揚限買一部，八方估計蘋果係想畀炒家心理準備，唔好以為可大手入貨。水貨客、宅男同OL，過去幾個月無時無刻都實蘋果電腦網站鬥快「㩒機」搶購，之前兩次開售唔夠一個鐘就售罄，日後1人限買1部，雖然可杜絕炒家囤貨，不過一日供不應求，iPhone4炒價硬淨依然。