尋找簡東拿？使乜搵，呢位昔日球星掛靴多年，周不時有搞作，仲要係出人意表嗰隻。好似日前宣佈出山，擔任美國足球隊紐約宇宙嘅總監。呢間球會嘅管理層陣容已不乏猛人，消息指萬人迷碧咸日後都可能加盟，到時兩代曼聯7號仔重遇，齋睇名氣，呢隊宇宙隊，絕對係宇宙級。
44歲嘅簡東拿退役後，大家一定記得佢拍過戲、踢過沙灘足球，而兩個月前受訪提到歐洲緊縮政策嘅示威浪潮，佢失驚無神呼籲民眾集體提光晒銀行存款，一度惹起軒然大波。
兜兜轉轉，佢終於重返球壇，紐約宇宙官網首頁（www.nycosmos.com）由之前嘅鍾斯，變成一個型爆西裝look嘅「大帝」坐喺度吞雲吐霧。聽佢講理想時振振有辭，唔似玩玩吓：「我好榮幸加入紐約宇宙，呢個係一個重大工程。宇宙隊歷史源遠流長，係足球同藝術嘅結合。我會盡一切努力幫隊波成為美國第一，然後成為世界最佳之一。」
空殼球隊兩年後望戰美職
呢一代球迷未必聽過宇宙隊，但上一代球迷就一定記得球王比利、碧根鮑華等巨星都效力過呢隊波。隊波班主保羅甘士利兩年幾前以200萬美元買入宇宙隊個品牌之後，決心重新打造球隊，雖然家陣仲係得個殼，但正努力爭取喺2013年參戰美職。
球隊家陣由球王比利做名譽主席，副主席係碧咸前經理人拜尼，至於前利物浦行政總裁佩利亦係董事，而簡東拿宣佈加盟前，前美國國腳名將鍾斯已率先出任足球總監。
近年碧咸個名一直同宇宙隊扯上關係，睇埋上述呢個管理層陣容，又真係好多都同碧咸有關，很難唔令人聯想碧咸出年夏天同洛杉磯銀河約滿恢復自由身後，可能會成為宇宙隊一員喎。
宇宙79年曾訪港
宇宙隊喺1971年成立角逐北美聯賽，曾5次贏得北美聯賽冠軍或者足球碗。效力過宇宙隊嘅殿堂級名將計有比利（圖）、碧根鮑華、阿爾拔圖、尼斯堅斯等等。1979年，擁有8位國腳級人馬嘅宇宙隊訪港友賽精工，可以話係香港球迷集體回憶之一。1985年，北美足球聯賽倒閉，宇宙隊一度解散，直到保羅甘士利09年斥資買番宇宙隊嘅隊名，球隊至「復活」。
