香港迪士尼樂園人均消費升7%，雖然當中未計及CPI上升因素，只係見EBITDA轉虧為盈已先飲得杯落，一年520萬人次入園唔係嘢少，香港納稅人唔需要擔心再為項目揹飛，庫房止血，只係仲未重新長肉。
迪士尼樂園最值錢當然係佢塊填海地，絕對有地產概念，如果拆咗佢，阿B就少個發洩精力嘅地方；既然米已成炊，港人係唔係應該學習接受現實，一齊幫佢諗諗搵錢大計，例如與美贊臣合作生產專為香港迪士尼樂園而設嘅奶粉，抄足海洋公園招數，實行有樣學樣最緊要受，令自由行家庭更有被關愛感覺之餘又有多一個賣點。
其實唔止內地自由行客，連印度客都應吸嚟玩埋一份，雖然印度接近11億人口比唔上中國13億（有說14.9億更近磅），社會發展水平亦較中國落後，但人口結構卻較中國年輕，生育率一向高，皆因沒有一孩政策；直至09年，印度供養老人比例只有8%，中位年齡25歲，中國則為34.1歲。
印度人口普遍年輕
想不到香港原來有個極具金磚國概念嘅樂園；至於東面靠攏東京迪士尼，西面靠攏巴黎迪士尼嘅俄羅斯，常住人口原來只有約1.5億，少年兒童比例約為15.6%，食盡金磚四國中最勁揪嘅兩個國家。根據德國世界人口基金會去年底發佈數字顯示，估計指今年全球人口將超過70億，香港迪士尼已成功盡攬當中超過3成人口，而且細路要嚟玩都肯定要有大人陪同，捉到鹿識唔識脫角好睇管理層嘅腦袋。香港政府前年把62.5億元壞賬資本化，兼要以債換股擴建迪士尼，被指洗濕咗個頭被美國佬搵笨實，增加三分之一面積起多3個主題區，多啲刺激機動遊戲當然會增加吸引力。
作為一個號稱國際金融中心，既然腸衣、拖鞋、膠喉都可以成功上市，點解透明度咁高，日日俾你數到人流嘅迪士尼唔可以？內地連榨菜股都炒上100倍PE嘅小散，又點會抗拒呢隻金磚概念股呢！
胡孟青
作者為獨立股評人