位於沙田石門嘅鄉議局新大樓預計4月上旬落成，高達1.8億元建造費至今仍然掹掹緊，身為主席嘅劉皇發終於喺關鍵時刻出手，豪捐300萬元畀鄉議局，其中100萬元會用嚟印製《新界鄉議局史》。呢本史冊原本諗住喺新大樓開幕時當紀念品送畀貴賓，但好多委員睇過初稿，發現好多重要歷史例如發叔成功爭取《基本法》第40條保障原居民權益等大事都漏咗冇載入史冊，既未能反映發叔功勞，又貽笑大方，令人覺得粗製濫造，何必呢？所以要再從長計議慢慢修訂審稿。
新大樓重要焦點係擺放發叔全身銅像，答謝佢多年貢獻。本周日出選龍鼓灘村代表嘅發叔話唔使點拉票，輸咗咪退休囉，似乎睇得好開。