咦，點解意大利國家隊嗰隊徽變咗隻雞嘅？睇真啲，原來唔係意大利，係法國隊嚟o架！法國呢件最新款波衫，靚係靚，但冇咗紅色嘅detail位，搞到成件意大利波衫咁，難怪教練白蘭斯忍唔住話：「好意大利囉！」
棄「三間」投「一剔」
法國隊同合作咗接近40年嘅「三間」分手，今年開始轉投「一剔」懷抱，聽講合約長達8年，總值4,260萬歐元（約4.4億港元）。日前佢哋推出新款戰衣，搵咗波爾多中場迪亞華、雷恩中場馬維拿、車路士中場馬隆達同阿仙奴中場戴亞比做模特兒。
睇番法國隊呢件新戰衣，採用Polo恤設計，將法式風格、法國傳統同「一剔」產品創新互相結合；呢件衫仲有細節，就係左胸靠上位置，印住法國足總標誌，背脊仲繡住一句法文「NosDifferencesNousUnissent（求同存異）」。下月9日主場友賽巴西，法國會首次着呢件波衫比賽。
本來呢件戰衣冇乜好挑剔，但好衰唔衰，同意大利嗰件由「一剔」製造嘅98世盃波衫似到十足。
白蘭斯：似意大利件波衫
法國教練白蘭斯話：「我覺得呢件全藍波衫好靚，但有啲似意大利件波衫囉！我哋都知法國人對藍白紅（法國國旗顏色）好有感情，我之前都有提過，好彩喺衫袖度有；只要你捲起衫袖，就會見到裏面嘅紅色。問題係，球員比賽時會唔會全部捲起衫袖，真係因人而異；但我哋着藍衫比賽，就會著白褲襯紅襪，所以都會睇到藍白紅。」
講真，我求大俠覺得法國呢件新波衫好有意大利feel，記得之前佢哋由「三間」贊助時，衫身一係有啲細節位係紅色，一係就有啲間花，總之唔會全藍。「一剔」咁做，好聽就係破舊立新，唔好聽就係冇創意；雖則話潮流係一個循環，都唔好咁似吖！唔知各位球迷，特別係法國躉，又點睇呢？
