大婆同二奶鬥足幾十年，CCTVB係咪真係多人睇啲？A記嘅節目係咪長期得幾點收視？長期處於捱打狀態嘅亞洲電視，噚日宣佈搵咗港大民意研究計劃調查收視真相，希望幫A記鹹魚翻生。鍾庭耀博士橫睇掂睇都似書生唔似神探，調查特首民望、點算遊行人數就出晒名啫，查案拍劇唔通都係鍾博士專長？
整咗個「優眾指數」
實情A記今次使幾百萬元同港大合作係想殺出一條血路。一直以嚟，CCTVB、A記同埋廣告商會都係夾錢搵獨立機構做收視率調查，最初搵AGB尼爾森，最近五年就搵咗內地機構「央視─索福瑞媒介研究」（CSM）。A記唔止一次質疑CSM嘅抽樣有問題，做嚟做去都係嗰650戶，死都唔轉，最近一次開火係2009年年底，大受好評嘅《亞洲星光大道》計出嚟收視率得7點，激到A記高層紮紮跳。
A記覺得遊戲規則唔公平，決定拒絕再玩，搵咗港大今年1月1號開始連續五年做電視觀眾研究，仲整咗個「優眾指數（QMI）」量度收視比率同埋欣賞指數，同以往用開嘅「每千次展示成本（CPM）」抗衡，每八個禮拜做至少6,500個不同樣本，係CSM嘅10倍。鍾博士今次被委以重任，話明做欣賞指數嘅調查好有經驗，唔使參考CSM點做云云。
噚日出席記者會嘅亞視高級副總裁鄺凱迎話，免費電視嘅廣告餅每年大約33億元，過去10年冇乜大增長；同一時間，電視觀眾嘅平均年齡超過40歲，甚至50歲，偏離咗香港人口中位數37、38歲，佢都好想知道究竟廣告商嘅budget去晒邊，同埋80後係點睇電視，希望TVB第日都會加入呢個研究。
曾醒明暗示方法out
雖然個研究只係開始咗兩個禮拜，不過鍾博士已經提供咗一啲初步數據，80後就有近七成人會用電腦或者手機睇電視，高過整體觀眾一成有多。
唔知係咪亞視嘅說話唔啱聽，噚日去採訪記者會嘅TVB行家聽咗唔夠10分鐘就拉隊走人。無綫電視外事部副總監曾醒明就暗示A記呢種調查方法已經out，佢話呢行自1992年起用「peoplemeter」即係個人收視紀錄儀24小時追蹤住宅用戶睇緊乜嘢節目，符合國際標準，之前用日記式，由觀眾自行記錄，再之前先係用電話訪問，無綫唔會用啲舊方法咁話。八方平時冇乜興趣睇電視，不過真係想知香港民調之父鍾庭耀vsCSM邊個會贏出。
mailto:[email protected]