臨近過年，大家頻頻出動，唔係拜年就係辦年貨。興高采烈之際一撻車就死火，敗興而歸算事小，喺2011年攞唔到彩唔老利就大鑊！今日就搵嚟大昌行Lawrence，醒幾招DIY驗車小技巧，只要揭開頭冚Check吓電及油，等大家順風順水迎兔年。
記者、攝影：徐影龍
Model：Betrys@GMEModels
鳴謝：大昌行
電
電池狀態一望就知
車主最常遇到嘅窘境，90%係同電有關。連有多年維修經驗嘅Lawrence，都試過年初一出車嚿電池唔聽話，全家人企咗喺度等搭過江龍。所以佢劈頭第一句，就語重心長話要Check電池。好彩家大部份車已換晒免入水嘅環保電，電箱頂設燈號提示，綠或藍代表正常，中央燈號變黑變暗就係需叉電嘅先兆。另外好多人忽略頭尾燈同指揮燈，出發前開齊燈圍住架車行一圈，望清有無燒燈膽，除避免夜晚無着頭燈遭抄牌，最重要係Brake燈同指揮燈，等尾隨車知你想Dup定Cut線。
氣
頭轆胎壓 毋須更高
當然係指胎氣，老竇教落前座坐人關係，頭轆要打大兩磅胎氣。Lawrence話無咁嘅必要，每次入油Check吓，跟番原廠建議磅數就OK。司機位門檻大多貼有胎壓標籤，即係原廠建議胎壓，單位通常係psi或lbs，去到油站跟住嚟打胎氣就得。反而提醒車主，打胎氣時最好「攤凍」架車，否則熱脹冷縮原理，磅數會唔夠準，間接影響耗油同行車穩定。
至於胎紋，法例規定淺過1mm就定為光頭胎，Lawrence建議最好有4mm，年份亦要留意，因膠類會出現硬化迹象，不論行車里數有幾多，超過5年已應該換新胎。
油
黃又黏夠新鮮
車頭入面藏有各式各樣嘅油泵油鼓，有偈油、波箱油、Brake油等形形色色，身處位置雖各有不同，但大前提係抽出油尺檢查時，油嘅狀態係呈淡黃色，開始變啡或再深色啲，就要攞去車房換油喇！機油水平亦要留意，以偈油為例，機油應去到刻度「E」至「F」之間，太多或太少都唔好。再摸摸佢，黏度要足夠，太稀或無黏性就唔多好喇！
