上周四特首答問大會，「大嚿」陳偉業發言時不點名暗批陶君行，將黨爭擺上立法會，過火行徑令人譁然，事隔多日，社民連噚日忽然發出聲明，表示要為陳偉業失態言行向公眾道歉。
聲明指連日收到好多會員、市民投訴，對陳偉業喺答問大會上言行好不滿，社民連話以往喺特首答問大會上，社民連議員抗爭，目的係凸顯制度嘅荒謬同不公義，為民主、民生議題發聲，不過陳議員卻利用呢個機會去攻擊黨友，誣陷事實、不斷抹黑，有違市民對社民連議員期望，所以社民連為陳偉業嘅失態行徑向公眾致歉。社民連副主席吳文遠話道歉聲明獲主席同絕大部份行政委員同意發出，但冇經行委會通過，事前亦冇通知陳偉業，至於是否要紀律處分追究陳偉業，佢話未討論呢個問題。
陳偉業稱當日只係對被要求封口表示感慨及悲憤，唔明點解要道歉，質疑黨主席雙重標準打壓佢。