雷聲大通常都雨點小，結局，更加係反高潮居多！好似民豐企業（279）舊年年尾興致勃勃向廖家大哥廖烈文買創興銀行（1111）股權，點知特別股東大會（EGM）前夕，中途殺出話廖氏家族其他成員唔「like」，仲話想狀告上法庭，所以，大家都諗住噚日有大龍鳳睇！
「adealgoodforcompany」
不過，出奇地，呢個守衞森嚴嘅EGM，場面異常平靜，把守門外嘅公關話，廖烈文大仔、民豐大股東兼非執董廖駿倫無嚟，華華眼睇亦唔覺有其他廖氏人蒲頭。最後，「保險教父」民豐主席楊梵城，喺無驚無險無人阻頭阻勢之下，「教父」揸住廖企同創銀分別增加到10.8%同6.57%，成功踏出轉型「銀行教父」第一步！
咁高興，「教父」當然要同大家講兩句喇！佢話個會議好成功，呢個交易對公司嚟講係好好，而且呢單係正常嘅業務交易，之後仲轉埋channel話：「Itisadealgoodforcompany.（這是對公司好的交易）！」之但係有人問佢作價合唔合理、有冇涉及法律行動嘅時候，「教父」就突然失聰夾即閃番入會場，之後冇再出過嚟，仲喺秘道鬆咗人㖭。
無咗個「教父」，華華惟有即刻執番個「教徒」─民豐小股東TOLANi.GJ，佢同「教父」一樣咁開心，仲話「Veryhappy!Abeautifuldeal!」但係佢好似唔知有姓廖嘅想狀告呢單嘢喎。
咁點解「教父」可以毫無難度就得手呢？下次見到廖氏一族，一定要問清楚！
李華華
mailto:[email protected]