自由黨榮譽主席田北俊重出江湖，上星期喺老巢沙田免費派叉燒飯，今晚會再派，自由黨咁大手筆益街坊，兩個新界東議員湯家驊、長毛都質疑有賄選之嫌，認為現時選舉條例有漏洞，只規管候選人唔能夠款待選民，以政黨名義搞就冇王管，擔心財雄勢大政黨飯票換選票。
立法會一個委員會噚日討論選舉條例問題，湯家驊借題發揮，指部份法律條文矯枉過正，若申報選舉開支有數元差額，也要勞師動眾向法院提交呈請，否則隨時被控，但政黨公然派叉燒飯拉攏選民卻冇王管，要求政府修例堵塞法律罅。
長毛稱如果派飯時唔拉票就法例可容，有錢派數以萬計叉燒飯嘅政黨好着數，民主黨張文光稱派飯盒好濕碎，因為以佢所知，有政黨派5公斤白米畀街坊㖭呀！