電影《讓子彈飛》大收，片中由姜文飾演嘅張麻子，就有金句「讓子彈飛一會兒」。歐洲足壇1月轉會市場重開，「銀彈」飛嚟飛去，都只係從曼城呢支大水喉飛出嚟，英超其他球會都只能寒酸擴軍；車路士拗贏熱刺手瓜收購愛華頓中場派拿，都只係用咗300萬鎊（約3,690萬港元）咋！
車仔平價搶派拿
車仔上仗雖然贏番波，但少榜首曼聯7分，熱刺又喺後面吼住個第4。以往車仔唔掂，班主阿巴莫域治都肯開水喉，08年1月轉會市場，車仔就收購安歷卡、伊雲洛域同迪山度，夾埋要成2,000幾萬鎊；今年形勢危急，但阿巴一於懶理，車仔出到橫刀奪愛，先廉價買到派拿。
南非28歲中場派拿同愛華頓得番半年約，熱刺一心諗住等佢季尾約滿，免費簽佢番嚟。點知車仔收到風就加入戰團，愛華頓為免人財兩失，答應車仔300萬鎊開價；派拿經理人周一同車仔傾掂個人條件，就可以轉會。熱刺領隊哈利列納就暗寸車仔搶人：「我哋同派拿傾得好哋哋，點知其他球隊又叉隻腳埋嚟，某位好受尊敬嘅領隊，仲喺電視上講對派拿冇興趣㖭！」派拿自己都講話想踢熱刺多啲，車仔真係勉強冇幸福。
車仔買到派拿，其實只係曼城收購迪斯高個「零頭」咁滯。睇番藍戰士今季收購，真係「王小二過年」，買拉美利斯都算高價，但班拿約同派拿都係廉價貨色；如果連埋出售卡維奴、史度治同史葛冼佳亞等，實際淨支出連2,000萬鎊都冇。
歐洲富豪球會多勒緊肚皮
其實又好難怪阿巴，事關成個歐洲，除咗中東資金嘅曼城同馬拉加，好多豪門都勒緊肚皮過日子；1月份嚟講，曼聯只收購丹麥門將連迪加特，巴塞隆拿吼住阿費利就快約滿，只用300萬歐元從燕豪芬收購佢。皇馬衰到想回收雲達斯達萊，又想借艾迪巴約，但兩單都未成事。
叫做見得下人嘅收購，得番拜仁用1,500萬歐元，收購賀芬咸嘅路爾斯古斯達禾；家轉會市場尚存嘅大目標，好似賓菲加中堅大衛雷斯、安德烈治前鋒盧卡古，又有邊隊夠曼城爭？