張靈×458Italia 周身刀躍馬彈起

張靈×458Italia 周身刀躍馬彈起

樂壇怎樣青黃不接,總不斷有新人上場挑戰。嚟緊將推出大碟嘅張靈(Miya),公司老闆不惜借出新玩具法拉利458Italia,為佢專訪造勢。能歌善舞係基本,Miya仲識作曲彈琴兼寫散文,磨利周身刀,2011年準備要跟有姿勢有實際嘅拉利睇齊。

記者:徐影龍
攝影:黃子偉

拉利變得親民

第一眼見到Miya,唔係Cutie大眼靚女型,亦非寸爆Rock友類,第一印象係有點似少女版陳敏之!我承認,對當日一併出席做專訪嘅法拉利458Italia更感興趣,皆因由前年法蘭克福車展,到幾個月前嘅香港記招,都係擺定定影相,得個望字,今日終可近距離跟它嚟個「大清之旅」。
4,800ccV8引擎,規格唔算好誇張,「EngineStart」設喺軚環上已經型到爆,甫一撻匙,拉利嗰把熟悉嘅雄渾低沉咆哮聲,足夠令300米內嘅人齊齊應聲而望。由於採用最新兩段燃油噴注系統,喺市區燈位及上山等路段,低中轉扭力比F430嘅單一噴注更強勁,毋須下下踩大油爆上山咁嚇鬼,而且鋁合金超輕身車架,跑完大清再入大拗門郊野公園,全程順滑流暢,比過往拉利更易駕馭。親身坐過458Italia,視野良好,低矮車身上落尚算輕鬆,原來超跑已經唔興「瞓喺度」揸。一小段短聚足令我驚覺,拉利都唔係咁難相處啫,難怪Miya老闆一口氣訂埋嚟緊嘅開篷Spyder版。

■兩段式缸內噴注,低中扭加速力表現更強勁。

■長箭形頭燈,配上一排三行LED,好有新鮮感。

■五星輪圈唔只好睇,仲有散熱嘅實際功效。

跳舞作曲動靜皆宜

嚟到拍攝場地,由夢幻之旅返回現實,跟Miya邊拍照邊做訪問,劈頭第一句,居然當住老闆面講:「唔鍾意拉利!」好有性格啫。傾落發覺佢好男仔頭,例如車牌屬2號棍波貨Van類、揸車鍾意左穿右插、儍乎乎誤入大嶼山禁區、最想揸日產GT-R等等,代步愛驅係新MINI,唔係貪佢Cute,而係要CooperS嘅Turbo狠勁!毋須顧忌身份及修飾對答,Miya畀我一種好爽好真嘅莫名好感。
咁坦率其實唔多適合香港樂壇,希望多才多藝幫到佢。她本身有跳舞底,今年七月出碟,鋼琴功架去到五級,已寫咗首《你別難過》畀自己,自細愛睇書,滿肚墨水望能出版散文集。能歌善舞兼有文化一面,動靜皆宜,值得睇高一線!最後例牌問題,Miya心目中有乜DreamCar?諗完一輪,揀咗瑪莎拉蒂GT。鍾意揸車嘅人,點可能唔愛超跑,可能只係不喜大熱,較為鍾情買冷罷!

■Miya勁愛紅色車,唔係要招搖過市,只因相士話利佢呢!

■打燈、撻車、轉懸掛模式,全部擺晒喺軚盤,勁似F1。

■黑皮加紅線車邊,內櫳洋溢着高級跑車格局。

■Miya揸車好男仔頭,屬於「唔使急、最緊要快」嘅類型。

Ferrari458Italia

引擎:4,499ccV8
馬力:570hp/9,000rpm
扭力:540Nm/6,000rpm
傳動:七速+/-波箱後驅
0-100km/h:3.4秒
售價:$3,563,000
查詢:23650269(ItalianMotors)