電盈（008）主席李澤楷（圖）又有BB要出世嘞！後日（20號）同嚟緊嘅2月14日情人節，佢將會有3個BB同大家見面！先講情人節個B，叫EJinsight，即《信報》英文版是也）。呢次亦都係網站同報紙一齊出世！呢個B，比起李生其他嘅B更令人期待，事關好多人等咗好耐，睇下EJ點同獨霸武林嘅《南華早報》較量，俾大家多個選擇！
《信報》CEO羅燦噚日同華華證實咗呢個喜訊，佢話呢排忙到成頭煙，除咗EJinsight之外，李生仲有一個B，叫EJFQ（信號），會率先喺後日（20號）出世！EJFQ係乜？根據介紹，呢一個係新一代股票追勢系統。燦哥話，EJFQ前排已經推咗earlybird計劃，反應唔錯，收咗好多客（要俾年費3888蚊）；至於EJinsight呢，報紙就會夾喺份《信報》裏面，至於網站就要收錢，月費200蚊樓下，咁都唔算貴，《信報》讀者群話晒都係專業人士嘛！
燦哥話，後日EJFQ面世之時係會有場研討會，所以，根本無時間諗EJinsight搞咩launchingceremony……話時話，燦哥有份主理嘅幾個B，喺「懷胎十月」之後陸續出世，但唔知另一邊廂亦係由李生打本，但「懷胎超過30個月」、由資深電視人陳慶祥主理嘅CBID（財庫智慧）又幾時出到世呢？