黃華麒以心臟病為由唔續約廣播處處長，政府公開招聘新處長今日截止，阿旦鄭丹瑞噚日喺微博自爆有獵頭公司搵上門，邀請佢入表申請，不過佢話冇興趣擔此重任，反而推介老友林珊珊上位。
周國豐表態力撐
阿旦出身港台，同林珊珊、何嘉麗主持節目《三個小神仙》一炮而紅，成為港台經典節目之一。港台員工要求新台長係「自己人」，阿旦先過一關，現任港台副台長周國豐即時喺微博力撐：「丹哥，你點解唔申請呀？都未試過同你做同事，跟你學嘢。」
幾年前政府放寬廣播處處長入職資格，冇大學學位都做得，當時被質疑為周融度身訂做，呢個新條件亦fit阿旦，佢係浸會傳理系產品，加上有多年廣播經驗，又做過商台高層，難怪獵頭公司睇中佢。阿旦做DJ當紅時轉型，跳到公仔箱同大銀幕，台前幕後瓣瓣掂，而林珊珊同何嘉麗後來轉戰樂壇，家陣各有發展。
目前係唱片公司高層嘅林珊珊冇喺微博回應做唔做處長，不過阿旦叫珊珊如果成功上位，記得重推《三個小神仙》，齊齊過吓主持癮。