葉劉淑儀創辦嘅新民黨真係星光熠熠，有多位前高官、闊佬做顧問，據講連「星之子」陳易希都入咗黨，咁識貨跟葉劉，陳易希可能好快就入禮賓府做助理，或者參選從政。
陳易希雖然年紀輕輕，不過腦筋唔簡單，去年幫煲呔拍廣告宣傳政改起錨，效果見仁見智，不過事後有傳言指佢對政府有微言，八方以為佢抗拒政治，原來佢咁熱心。新民黨今日舉行黨總部開幕儀式，通勝話今日宜開幕啟市，相信葉劉都有搵高人指點迷津。
各界對葉劉出選特首行情不敢看淡，其政治能量未見底，四大商會之一中華廠商聯合會星期四請葉劉做每月會董晚宴嘉賓，以《政黨的角色及發展前景》為題演講，畀足面呢個新黨主席。