根據傅會長所言，開工要揀吉日。今年嘅新春公眾假期放到年初四星期日，年初五（二月七日星期一）要返工，但呢日唔係幾好噃，係「危日」，用此日，業務會停滯不前，如果選擇年初六下午一時至三時先至開工，比較理想。至於工廠方面，可選用正月初十（二月十二日）星期六下午一時半至三時。
除咗團年、拜年、開工三個日子之外，兔年犯太歲嘅有四類人士，傅會長請佢地注意：（一）兔（卯年出生）：犯太歲，困難重重，切忌賭博，小心感情問題，最好避免探病問喪，要佩戴化煞牌；（二）雞（酉年出生）：冲太歲，容易與人衝突磨擦，職位可能有變，有咳或喉嚨痛，勿去娛樂場所（賭博）；（三）鼠（子年出生）：害太歲，會遭人篤背脊，處理事務要特別小心；（四）馬（午年出生）：刑太歲，小心簽合約、易犯官非。
不過，犯太歲不一定全是負面，仲要夾埋個人八字性別，先至可以推算得準一啲。千萬要保持樂觀冷靜，會長勸上述人士盡量行事謹慎小心，不宜隨便裝修動土探病問喪。此外，還有六類人士稱為太歲壓祭主──即是不能送先人上山或火化，包括庚子年（一九六○）、乙酉年（一九六九）、戊午年（一九七八）、丁卯年（一九八七）、丙子年（一九九六）、乙酉年（二○○五）。
風水方位方面，不要在太歲頭上動土，兔年太歲方位在正東，亦是五黃（疾病）位，術數源於中國，中國為正中，中國之東係邊啲國家呢？大家睇吓地圖就知道。正西係三煞位，不要動土，但正西方同時也是九紫喜慶之位，容易有喜事，正西方向有喜有悲。吉位在東南，南方也不錯。大門口在正南嘅，可用紅、藍、綠色地氈，忌用灰黑色。以上還要與屋主八字、屋運及地勢而定。
市道方面，庚寅虎年，大上大落，辛卯兔年，因係陰金陰木，陰陰濕濕，庶幾近之；老虎來勢洶洶，明眼人一睇便知，兔仔就唔同，狡兔有三窟，逃跑捐窿就最叻，今年市場可能有人出蠱惑去搵錢，暗中炒起炒落，大家留意則個，農曆八月（九月八日至十月八日）最要小心。昨日今日所述，可信可不信，供一大批讀者參考而已，正是徇眾要求，唔鍾意嘅讀者，不必來信罵左丁山。