「不如簡單介紹吓自己先啦！」
「我叫陳皓婷，今年30歲，高148cm，重48公斤，不過你寫47好喇！」
眼前這位與電台DJ小儀高度一樣的女子是陳皓婷，洋名Hoty，是香港女子欖球隊員，5呎不足的嬌小身形，卻是本地欖球界icon，每當Hoty在球場上突破防守，場邊球迷便會大嗌：「Hoty好波！」比賽面對「大嚿鬼婆」對手，Hoty毫不怯場，更以靈活身手巧妙閃避，突破防守達陣取分。
取勝之道扭開對手
很多人認為英式欖球是一種暴力運動，女士們更對欖球敬而遠之，深怕玩欖球會變得渾身肌肉，大腿變粗，甚至擔心碰撞會損毀花容，Hoty不但「冇有怕」，還說自己有獨門絕招。
其他球類運動衝撞對手即犯規，欖球卻可合法衝撞，球員可以膊頭推向對手的膝頭位置，雙手環抱對手雙膝，把對手推跌；運用這種「擒抱」技術不能一味鬥力，僅高148厘米的Hoty更有先天優勢，因為對手要把身體彎得極低才可以擒抱Hoty，對身形高大的球員來說，難度甚高。
13年前Hoty在學校初次接觸欖球，相比一向玩開的羽毛球及跑步，Hoty就更愛欖球的團隊精神。11年前她加入銅鑼灣欖球會，同年獲選為港隊代表，位置是scrumhalf，在場上負責協調前鋒及後衞。她說自己體能差，取勝之道是：「扭嚟扭去，扭開對手，然後將個波傳畀跑得快嘅後衞；要撞就梗係搵啲大隻嘅前鋒去撞啦！」能夠在兵荒馬亂的球場上看清形勢，亦是港隊教練看中Hoty的原因。
打了十多年欖球，Hoty說最難忘是剛參與的廣州亞運會，「第一次有港隊女仔可以參賽，我係第一次參加亞運，亦好可能係最後一次」。遺憾是球證錯判，港隊在加時輸一球，結果只得殿軍，「好唔抵，唔抵到我返到香港都仲會喊」。
指港申亞浪費公帑
早前政府將金牌運動員擺上枱，游說議員支持申辦2023年亞運，Hoty卻大力反對申亞，認為政府好大喜功，浪費公帑，「香港邊度有地方可以好似廣州咁，起到成個區咁大嘅亞運村？你起啲場館，點保證使用率？之前搞東亞運已經搞得好核突，有乜理由有啲項目得三個運動員都可以比賽？當年喺東區起咗個足球場，家有幾多人用？市民都唔熱衷，根本就係政府班人自己喺度拍掌」。
談到本地體育設施問題，Hoty滿肚苦水：「我哋練開波嘅掃桿埔運動場，落少少雨就話去唔到水要封場，都唔知個場係咪用紙造！個場連飲水機都冇，次次都要買樽裝水，好唔環保！」與其大花筒興建超豪場館，她認為快快改善現有設施，對市民以及運動員來說更實際。
訪問尾聲，記者好奇問Hoty有否拍拖，原來Hoty男友是另一球會的英籍欖球員，身高近6呎，即與小儀的拍檔森美相若。愛情無分國度，亦無分高度。
記者 袁慧妍