幾十年前香港有「文化沙漠」之稱，意指香港人人向錢看，冇文化，人稱肥平嘅前高官何志平在位時主管文藝，噚日露面卻不談文化問題，反而大力鞭撻香港人愛國意識嚴重沙漠化，所以佢最新任務係要設法灌溉香港人枯乾嘅愛國心靈。
肥平叫學生捐利是
面相體態越來越飽滿嘅肥平，打算如何滋潤香港人乾涸嘅愛國心呢？做法簡單實際兼直接，就係科水，即係捐錢返大陸。肥平幾個月前同基本法委員會港方委員劉迺強搭上，兩人在黨嘅領導下都十分愛國，一拍即合齊齊搞「寸心行動基金」，呢個基金目的係幫中國沙漠化和荒漠化地方籌錢改善生態環境，並為當地孩子提供獎學金，幫佢哋脫貧改善生活。
港府搞關愛基金抽乾闊佬財團捐款，要滋潤香港人愛國心，肥平向中、小學生埋手，呼籲細路捐出利是錢畀寸心行動基金。肥平好老實，指呢啲籌錢活動善款有限，對內地窮人而言只係杯水車薪，做嚟都係嘥氣兼戇居，之不過諗深一層，卻覺得好有意義，事關佢發覺香港人愛國意識嚴重沙漠化，仲弊過國內滾滾荒漠，涓滴全無。
因此肥平話希望藉籌利是錢活動，灌溉國內沙漠同時，可以灌溉埋700萬香港人嘅「愛國沙漠」，令香港人更了解國情，劉迺強聽完肥平咁講，都話撐到底，指香港人對祖國關懷真係唔夠多。聽完兩人七情上面言論，八方滴晒汗，原來唔捐錢等於唔愛國！如此籌款，同新年「送桔黨」屈錢有乜分別？捐錢就是愛國，難怪領導人對香港富豪另眼相看，南下深圳都要同首富握手啦。
有幾十間學校參加
香港人不愛國證據確鑿，每年六四，數以萬計港人響應顛覆國家組織支聯會參加燭光集會，國內大地震，捐款數以億元計為災區重建，藉詞追究豆腐渣工程，破壞社會和諧，咁搞法，喺肥平、劉迺強眼中當然係不愛國行為，更離譜係大家都唔學似佢哋咁愛黨。
兩個藉詞愛國嘅「送桔黨」透露，已接觸約1,000間中、小學，呼籲學生自發捐利是錢，暫有幾十間學校參加。
mailto:[email protected]