電子版《清明上河圖》舊年喺香港展出時幾哄動，香港本地農業發展關注組諗住有樣學樣，整幅港產農家「清明上河圖」，等市民關注吓香港本土農業發展。
親訪農戶收料
喺噚日嘅「香港農業誰主浮沉」研討會上，幅圖嘅初稿首次曝光。作者係香港理工大學設計學院36個修讀美術設計教育嘅同學，佢哋親身去過菜園村同錦上路，聽18戶受高鐵收地影響嘅農戶講古仔收料，然後一筆一劃，畫出現代港產農家嘅故事。
呢張港產農家「清明上河圖」初稿暫時淨係見到村屋，創作嘅同學話，稍後會加上不同嘅人物、牲畜、樹木、河流等，令張圖更有生氣。集體創作完成後，佢哋仲計劃喺石崗同市區展出。
受高鐵收地影響嘅花農陳太就話，前日收到最後通牒，限令佢呢個月21日前搬走，否則連「恩恤金」都冇得賠。陳太一肚氣，話佢屋企冇人過身，唔要「恩恤金」；不過辛苦種落嘅年花，因為當局起高鐵被強行收地，隨時過唔到年就玩完。