3D裸視DV　拍片隊爆芒

假如睇睇吓片，突然有支槍從屏幕伸出嚟隊住你，保持鎮定！因為你用緊一部具備裸視功能嘅DV──SpeedFX-1；雙鏡頭、3D攝錄已經唔係新鮮嘢，佢最爆係配置3.2"3D屏幕，毋須戴立體眼鏡，便可欣賞DV精采內容，更難得機價兩千唔使，粗粗哋買番嚟扮占士金馬倫拍3D猛片，諗得過喎！

記者：陳國輝
攝影：伍慶泉
Model：Kinki@ZModel

3D攝錄　直出高清電視

想拍3D電影，又使乜搞到好似拍《阿凡達》咁揼本先！呢部FX-1大概可以滿足發夢都想做「3D大導」嘅Fans，首先佢與一般DV唔同，FX-1配備兩組36mm鏡頭，而且每一邊都係500萬像素CMOS，直接影相嘅話，就可輕鬆製作一幅高解像3D照片。
當然，拍片先係佢主菜，使用3D模式嘅話，最高可攝錄848×480嘅高解像Movie，如果想轉番做2D模式，㩒一下機身後面粒「3D」專用鍵，就作即時切換，喺2D模式下仲可拍到720p高清效果！
拍好片之後，梗係想第一時間掟落電視欣賞，機側具備一組高清視頻輸出，透過跟機HDMI線，即可接駁家用HDTV，若然錄製3D片段，亦可駁到3DTV睇番效果。

■雙CMOS鏡頭，機前仲有一盞補光燈，火力一般。

激凸手槍　Menu也裸視

講到3D攝錄機，查實各大品牌已相繼晒冷！FX-1除咗以平價作招徠，更值得留意係佢機身配備一個3.2"裸視3D屏幕！
簡單講，即係你毋須戴立體眼鏡情況，就睇到Playback或Preview嘅實時立體影像。咁都未算，打開Menu嗰陣，你亦可透過「3D」專用掣選取2D/3D嘅視覺效果，反應仲幾快，真係估佢唔到。
但要注意，呢個芒唔單止等同一般手機屏幕咁細，顯示色彩亦跟實際情況有好大差別。例如記者當日於會議室內試用，就算室內全部開白光管，但屏幕色彩仍然偏暗，甚至乎間歇性出現偏黃現象。用作一般Preview就無問題，當佢係色彩指標？就真係太勉強喇！