網民嘅威力有幾大？睇吓連高盛舵手布蘭克費恩（圖）都要紆尊降貴，親自出馬去拍門傾「刁」就知道啦！
早前傳出全球團購網一哥Groupon打算喺今年上市。高盛行政總裁布蘭克費恩喺上周四，就親自去到Groupon芝加哥嘅總部拍門，同班老闆開會，話希望網站上市嘅時候，會揀高盛做佢哋嘅包銷商。佢仲話自己係facebook股東，對新興網站瞭如指掌，做路演嘅時候就包冇甩轆啦。哇！高盛舵手都咁勤力，抵佢哋年年賺大錢，分咁和味嘅花紅啦！
之但係睇中Groupon嘅，唔單止高盛，有傳摩根士丹利有意競逐包銷商嘅工作。不過，人哋高盛出動到CEO喎，誠意分都攞到十足啦。華華聽講，Groupon家估值大概係150億美金，要分肥豬肉，各大行要出盡力sell先得喇！