申亞一如所料起錨失敗，「河蟹局長」曾德成想威威，點知躀低，心情可想而知。
噚日《城市論壇》以申亞諮詢為題，出席嘉賓有時事評論員、議員同運動員，偏偏就係唔見政府代表，亦唔見送政府一程嘅好盟友民建聯議員，只係得青年民建聯小貓三四隻撐場。
獲邀出席冇聲氣
八方問過主持謝志峰，佢話工作人員喺周五表決嗰日打電話去邀請政府代表嚟《論壇》，對方最初話會盡量安排，不過之後就冇咗聲氣，可能政府嗰日忙到甩轆唔得閒理佢哋，不過之後禮拜六一樣冇咗影。謝志峰話，呢鋪政府馬失前蹄，唔派人出席都係人之常情，不過冇咗政府意見，要總結今次經驗梗係爭咁啲。
申亞收工既成事實，大家都覺得政府應該搞清楚死因。陳淑莊噚日就話，政府一直以來都冇做好教育同協調工作，上次港足贏咗東亞運，就以為民意一定支持申亞，真係好天真好儍；況且與其一炮過搞亞運，不如搞多啲常規性活動好似每年一次馬拉松，咁先可以凝聚市民。
前單車手洪松蔭就希望大企業都出吓力，好似人哋日本啲公司咁成立體育部資助運動員。