這邊廂，唐唐執人口水尾發表「車毀人亡」論單挑80後，赤裸展現爭上位嘅野心；那邊廂，無心戀戰嘅鬍鬚曾就繼續喺自己個blog上風花雪月，緬懷後生嗰陣喺美國留學嘅美好時光。
佢話當年中國人喺美國都算係少數族裔，好多人融入唔到主流社會，所以佢成日同啲黑人朋友玩埋一堆，其中一個同佢一樣鍾意劍擊，仲係一個類似黑豹黨組織嘅社會工作義工。
朋友仔帶少年鬍鬚曾參觀哈林區嘅支部，令佢大開眼界，最深刻係人哋搞群眾活動同推動革命理念嘅諗法。鬍鬚曾話佢到家都仲好懷念嗰個理想主義嘅時代，咁唔知唐唐同80後之戰，佢會企喺邊一邊呢？