拜仁慕尼黑喺2010年下半季黑到爆，除咗有洛賓長唞半年，仲喺歇冬前俾1哥多蒙特拋甩14分。以為踏入2011年後佢哋會轉運，點知黑上加黑，上周六作客禾夫斯堡慘被逼和1:1，同多蒙特嘅距離越嚟越遠，而且列貝利打咗20分鐘左右就因左膝受傷而離場，一度傳出要長唞，好彩佢稍後證實只係要唞兩個禮拜。
德甲下半季上周五重開，拜仁前晚出戰有射手迪斯高過檔曼城嘅禾夫斯堡，僅7分鐘就由湯馬士梅拿開紀錄，點知啲運行咗唔夠20分鐘就完。季初因右足踝韌帶撕裂唞咗兩個月嘅列貝利，喺20分鐘於禁區邊俾對手中場祖殊粗野攔截倒地；佢喺場邊治理期間，柏拉積喺21分鐘於禁區內俾主隊前鋒迪查加踢跌而幫拜仁博到12碼，但主射嘅拿姆中內柱唔入，搞到拜仁唔能夠將比數拋離。
洛賓復出救唔到「仁」
拜仁唔能夠將優勢擴大，仲喺25分鐘冇埋列貝利，事關經軍醫治理後證實佢唔可以繼續比賽，要由洛賓入替，事後證實要休息兩周。列貝利話：「我真係好開心，仲鬆咗一口氣㖭。」
查實禾夫斯堡完半場前都有球12碼，不過操刀嘅加菲迪亦宴客。以為拜仁大難不死必有後福，但點都逃唔過失分厄運，喺86分鐘俾對手後衞沙斯查列達射入，慘被逼和1:1。
雲帥打定輸數：爭第2
呢場波拜仁有洛賓久休復出，本來好值得高興，點知有列貝利傷出，而且喺完場前由3分變1分，真係乜癮都冇晒；而最失望嘅係，1哥多蒙特上個禮拜五作客贏利華古遜3:1，換言之雙方嘅距離亦由14分拉開至16分；而由於歇冬時排2、3位嘅緬恩斯同利華前晚齊齊輸波，所以多蒙特嘅冠軍賠率亦由1.2倍熱到得番1.08倍。雲高爾話：「我哋要有心理準備只係攞到第2名。」
話時話，前晚6場德甲共有4球12碼，除咗拿姆同加菲迪外，弗賴堡前鋒柏比斯施斯同紐倫堡後衞賓路拿都宴客，唔通歇咗冬成個月搞到對腳硬晒，唔記得點射12碼？
