盧覓雪對食好嘢的熱情，唔好話喺香港山旯旮咁遠都要開車去食，即使今次飛到馬來西亞，反轉吉隆坡各大食肆之後，嗜食大軍繼續北上殺入霹靂州首府怡保。
記者、攝影：蕭漢祥
鳴謝：馬來西亞旅遊促進局（香港分局）、馬航假期、恆利旅運、NovotelKualaLumpurCityCentre
趕路搵食之旅
講到好似進攻怡保（Ipoh）一樣，因為今次跟盧覓雪（Michelle）去怡保的喪食程度，遠超之前在吉隆坡的情況，唔把握時間，恐怕幾日之內都食唔晒。當日晨早由吉隆坡出發，全程又直又平的高速公路，都要坐超過兩小時車先到，難怪有個模特兒朋友話，她之前keep住以超過二百公里開車都要揸好耐，結果更谷爆引擎當場跪低。但今次係為咗搵嘢食，為何又要咁趕呢？原因有二，第一係當地食店奉行「賣晒就閂門」的習慣，唔似香港咁賣晒就即時入貨，開門到深夜為止，好似第一間到訪的「老黃」店，去到都好驚食唔到。
必食1
肥美多汁芽菜
「老黃」位於一個十字路口，從前的怡保人口及遊客不多，揾位容易；但這次一落車，即見人山人海，老黃更是座無虛席，直情要坐到出馬路，好壯觀！Michelle嚟到一坐低即點了一碟雞雜、豬肉丸等，但重點都不在此，而係……芽菜雞，仲要係芽菜比白切雞更重要！小記心想唔係呀，芽菜在香港不單止不值錢，有啲人點菜直情會走青走芽菜㖭。食店第三代老闆Simon兄解說，由於怡保出產的芽菜特別肥美多汁，煮熟上碟時只要加豉油、麻油和胡椒粉已經好好味，每日入貨約700公斤都可以日日清。小記試食後發現，怡保出產的芽菜較香港的肥和短，但食落真的清甜多汁。究竟係芽菜打咗肥仔針？定係佢哋太好食好住養肥咗？當然要研究吓。
a.老黃芽菜雞沙河粉
地址：49JalanYauTetShin
芽菜降溫秘技
講到芽菜，小記真係好好奇，香港食到的又幼又韌，但怡保的就好像另一個品種、好似見到外國的窈窕淑女一樣嗒晒糖。其實怡保好多食店的芽菜，都係由一位稱為芽菜良的師傅親手養殖。養得靚唔使好似打機咁「chok秘技」，而係要靠天時地利人和，芽菜良準時為芽菜淋水降溫，減慢發芽速度，再加上非常重要的地下優質水源，令芽菜於成長的5日之內，肥肥白白的長大成「菜」。
必食2
魚蛋王子 點半賣晒收檔
之前話去怡保食好嘢要趕時間，以下呢間就係第二個原因，未去過怡保的朋友可能唔知，怡保係一個時空交錯的地方，有着六七十年代的環境、八十年代的衣着，但睇緊2010年的TVB劇集，林峯在當地有好多fans的，難怪攞「亞太區最受歡迎」獎啦！當地人工作時間更令港人羨慕，好多餐廳營業時間只係得半日，過着qualityoflife的生活，唔趕嚟肯定會食唔到。
當地食肆又好興一舖幾個租戶，有人提供水吧服務，其他就提供不同菜式，直情就係foodcourt的始祖。講番Michelle推介新聯利茶餐室內的榮貴粉檔，雖則菜式平民化，都係炸魚丸、豬肉丸、魚蛋河粉等，但道理好簡單，粒丸食落feel到真材實料，而河粉又煙韌就已經係麪食值得推介的王道。少東阿John同爸媽三口子，每日早上七點幾開檔，到下午一點半賣得七七八八就關門。咁早休息嗎？咁又唔係，關門後阿John會由魚蛋王子搖身一變西裝骨骨出現，賣保險係佢第二職業，厲害！
b.新聯利茶餐室
地址：JalanBandarTimah
必食3
又粗又長大碌麪
到下一站，Michelle一開口就話最愛「福建啲又長、又粗的東西，咩女人食咗就滯成個月……」嘩！乜咁引人入「性」呀。計我話，唔止粗長，仲要好黑㖭！因為Michelle講緊嘅係黑豉油大碌麪，四年多前，張氏夫婦所開的南橋茶室，轉名叫旺閣茶餐室，好香港feel。但張師傅拿手的大碌麪，係用馬來西亞特產的黑豉油、福建的大碌麪，配合秘製的豬油渣、肉片等快手炒熟，麪身深色帶光澤，香味四溢。大碌麪只係「小食」，因為張師傅最強嘅係煮海鮮，兩三下手勢便煮出蛋黃炒肉蟹、炒蜆等，美味程度比香港出名食海鮮之地，有過之而無不及。
c.旺閣茶餐室
地址：39,JalanSeenivasagam
TastesinIpoh
溫馨提示：李安的《色，戒》、譚家明的《父子》等電影都在怡保取景，當地充滿六七十年代色彩，且天色又靚，啱晒攝影發燒友。
TravelMemo
持特區護照或BNO免簽證。馬來西亞領事館：28210800
吉隆坡三日兩夜之旅，包馬航來回機票及入住吉隆坡Novotel酒店，每人由$2,570起。馬航假期： http://www.masholidays.com.hk
1馬幣約兌2.54港元（文中價錢已折算港元）
240V，三扁腳插座
馬來西亞
怡保
下周有雷暴23-32℃
