一級歷史建築前任行政長官辦公室噚日開放日，共吸引逾1,800人入場。朝早人流唔算多，午飯後就越嚟越多人，高峯時逾百人排隊。參觀時間下午5點結束，警方3點就截龍，唔少市民失望而回。
向隅嘅包括蔡先生一家，佢話三個仔都喺皇仁書院讀書，辦公室前身曾經係皇仁書院校舍，所以想入去參觀吓，點知阿仔唔願出門口，三催四請下一家人終於嚟到，但又得個桔：「有啲失望囉！」
伍先生同讀中三嘅囡囡下午兩點前到達，成功入場。佢大讚導賞員專業，對辦公室嘅歷史背誦如流。中五嘅李同學就覺得拱門上方嘅彩色雕花玻璃同啡色地磚最特別。李生大嘆呢種西式大宅建築喺香港買少見少，希望可以多啲開放。