二月三日就係年初一，不過立春就係在二月四日星期五中午十二時半後，換言之，到時先至正正式式步入辛卯年。往年梁玳寧女士在「經濟日報」寫稿報導研易學會會長傅沛基之來年推算，特准左丁山在本欄覆述，但梁女士逝世後，只得另作安排。去年一位熱心校友Y特別介紹左丁山與傅會長在陸羽飲茶，於是幾唔怕醜咁轉述傅會長之虎年預測。去年末，已有讀者來郵，請左丁山想想辦法，找傅會長講幾句，因為佢幾年來睇「GiGi細語」，緊隨傅會長之言辦事，覺得年年運程平穩，生活愉快喎。
既有讀者之命，度緊方法之際，老友記突然來電，話佢已專程到傅會長府上拜訪，詳談兔年運程，得其要旨，將於「經濟日報」發表，完稿之後，特准左丁山將原文摘要在「GiGi細語」發表。啱晒啦，得來全不費工夫，多謝都嚟唔切。相信運程之說嘅讀者，應該高興啩。
閒話少講，傅會長指點幾個日子，請大家存記：
（一）年尾還神、洗邋遢、團年之首選日子係農曆十二月廿三，即係一月廿六日星期三，對旅遊、運輸業人士最有利，肖豬者不宜，通勝指示是日吉時係巳時、午時及戌時。傅會長推薦上午九時半至十二時。不過，年廿三係星期三，是日返工兼跑夜馬，如果太忙，可選擇年廿七（一月三十日星期日），吉時係辰時、酉時，會長指點用上午七時半至九時，下午五時半至七時，晚上七時後係中等選擇。如果一日做唔晒，可分一月廿六，一月三十兩日做。
（二）拜年開年日，虎年冬至（去年十二月廿二日）係破日，日子不佳，兔年要補番一啲好日子，要特別注意。年初一（二月三日星期四）唔係好日，會長話是日為四絕日，煞氣甚重，不要拜年，要到年初二下午一時後先至開年、拜年。「通勝」在二月四日立春有云：「節前仍四絕，午後宜會友」，請大家留意。有見及此，今年年初一最好留在家中活動、食齋，到年初二下午一時後先至拜年。不如咁嘞，年初一與家人出外睇波、睇戲或在屋企睇電視煲碟就係唔去拜年。