MINIONE再升呢　難辨潮驅

人人買車都會算過度過，個個埋單都想慳到盡。有條數包你賺梗，佢就係MINIONE。舊年首次到港唔係咁多人識，造型又跟Cooper不遑多讓，而2011版新面貌更再次升呢，確實跟Cooper大哥霎眼難辨，入門價就有得揸MINI呢條數，仲唔係最抵玩？

記者：許維雅
攝影：譚盈傑、陳陶鈞
Model：Rika@GME

換面換軨辟齋味

雖則話MINICooper的潮Look最成功地方就係男女老少皆宜，但無可否認它的最大目標市場始終係年輕人。動輒廿幾三十萬元的車價，好多愛MINI的年輕人其實未必供唔起，只係掙扎在捨唔捨得之間。
舊年三月首次到港的MINIONE，以入門價廿萬有找的價錢就可以買到MINI的誘力，已經成功打破唔少人的心理關口。2011年版新MINIONE再上場，跟隨MINI家族一齊改款，車頭鬼面罩保留三粗間電鍍的簡潔設計，但下面撞入生風口的柵格就跟Cooper一樣，換上一個更大的哈哈笑嘴巴，加上車頭泵把又變得更立體，令壹仔面貌即升呢半級。此外，車尾亦換上全新設計LED尾燈，雙紅間圍繞住橙色圓形死火燈的設計夠Trendy，配合輕輕改動的尾泵把、拉長了的底部煞車燈，壹仔造型再升呢半級。成日都話胎軨係一架車的靈魂，架車可以換對靚鞋出場，效果的確差好遠，ONE上一代的15吋輪圈只得鐵皮軨，今次換上五輻式雙間合金輪圈，簡直升呢一級，肯定唔會再俾人嫌太齋，同Cooper大哥逐步睇齊。

■生風口柵格拉大搶眼，泵把亦更富立體線條。

■1.6公升引擎容積無變，但改良後更環保。

■米白色車身配橙色MirrorCap係我最愛的色水配搭。

■15吋合金輪圈的新雙間設計比起上一代好得多。

引擎更環保　每公里八毫

內櫳方面，中控台、錶板、座椅等各方面鋪排都同MINICooper完全一樣，雖然裝潢不夠豪華，無真皮椅、無多功能軚環、無電鍍邊點綴，但新一代MINIONE改用全黑色中控台，一樣夠Cool，大圓錶板旁邊襯上淺銀色飾板點綴，簡潔保潮味。
除了設計上有所提升，跟家族齊齊換上BMWValvetronic技術的新引擎，只要有機會一試，你絕對唔會睇小佢98匹馬力的性能，起步反應爽快、動力傳送直接的效果，相信熱封包技術的傳動系統亦要應記一功。而且改良後的新引擎更趨環保，綜合耗油只需5.4L/100km，以每公升油$15計算，每公里都係$0.81，二氧化碳排放同時降至127g/km。越揸越好玩的MINIONE，令人忍唔住踩多幾個圈，迫力及油門一踩即到的反應，比起Cooper更輕更舒適的軚感、入彎的高卡車操控，所有女生試完都大讚啱晒女仔揸。坦白而言，我都係MINI粉絲，他朝有機會買車我都揀佢，加上現在提供免首期低息供車，月供只需$3,800，我都供得起啦！