銀行界音樂椅喺新一年響起，華華收到料，行年五十有八嘅中銀香港（2388）副總裁林炎南（David），將會喺今年4月退休，接替佢嘅人選之中呼聲最高嘅，就係舊年下旬先至由母行中國銀行（3988）調過嚟跟David、現任中銀個人金融及產品管理總經理周銘佳。
周銘佳接班大熱
中銀內線人話，佢哋間行55歲係退休之齡，過咗呢個年紀，要幾時退休就係當事人自己決定，所以David呢個時候退下火線，唔使覺得意外。中銀發言人回覆話，唔評論市場傳聞，但中銀作為一間上市企業，有咩消息要公佈，一定會出通告。至於傳到㷫烚烚會接任嘅周銘佳，過嚟跟David之前，係中行廣東省分行嘅副行長。
講番David呢位元老級臣子，佢係01年獲委任嘅四大副總入面，至今碩果僅存嘅一位。01年中，中銀集團完成12行合併，重組成為中銀香港控股公司嘅歷史壯舉，時任浙江興業銀行（後併入中銀香港）總經理嘅David，就獲委任為4位新任副總裁之一。
佢亦係繼中行香港分行（後併入中銀香港）第一副總經理柯文雅之外，四名副總裁之中，唯一一位唔係由北京調嚟香港嘅本地人士，兼且係合併前12行老總，出掌新架構嘅高層。
喺中銀香港重組合併前，即仲係港澳管理處統管下嘅13行年代，林炎南已經長期喺中銀成員行之一嘅廣東省銀行，擔任財資業務部老總。中大畢業嘅林炎南，談吐作風一向斯斯文文，係80年代初中銀集團第一代從中大聘請嘅行政練習生（trainee）。
興趣多籮籮嘅David，據聞早年喜好收藏紫水晶，藏寶之豐富，已達專家水平，收藏興趣或與其練習氣功有關。
不過，近年林炎南已經專注打高球，並且喺行內贏得「高球大王」美譽，佢對打波嘅熱衷程度，已經接近個個星期唔打唔安樂嘅地步。華華聽講，佢歷年獲獎無數。想見識林生嘅超卓球技，可以去深圳觀瀾個場，碰吓運氣。
mailto:[email protected]