華華前幾日同老友飯局，席間來自神州嘅老友，講到市建局主席張震遠（圖）。老友話，張生08年係威係勢，搞咗香港商品交易所，仲吹雞搵咗班猛人入股。家2011年喇，呢個商交所仲未交到亮麗成績表。
商交所08年6月成立時話，09年首季推出燃油期貨，之後改為先推黃金期貨，曾經預期09年第四季及去年第一季推出，但一直只聞樓梯響。到咗舊年7月又話去年底會推出。點知都係無嘢睇。家新加坡同埋上海都出咗，連金銀業貿易場都話，下個月推出黃金期貨。商交所第一個BB都未知幾時才出世。
老友話，當時入股埋班嘅個筆錢已使咗唔少，聽講有股東要問問發生乜嘢事，好似話已經非正式知會咗商交所，要解一解畫。
至於邊個大款要過問？老友話唔爆得，總之係其中一個。翻查資料，商交所首期投資額5000萬美金，主要股東有中信、美林、雷曼、泰山石化、華潤集團同巴克萊資本。六個答案，華華請大家估吓。