最近胡潤百富榜聯同雜誌《財富人物》同中央電視台合作搞咗個「2010年中國80後企業家財富榜」同埋「80後作家收入排行榜」。年輕企業家個個身家億億聲，連揸筆搵食嘅作家都可以年收入幾百萬，果真後生可畏。
講番作家收入榜。港人較熟識嘅內地80後靚仔作家韓寒（圖），過去排名唔係第一，就係第二。點知今次爆冷，輸咗畀一個叫張一一嘅人，只得第三名。據華華了解，呢位張一一曾經撰文狀告中國足協，又公開寫情書畀著名主持人李湘，仲曾經發炮質疑余秋雨、金庸等「大師」嘅身份。唔知韓寒知道呢個賽果，會唔會有小小黯然神傷。
至於企業家財富榜，碧桂園太子女楊惠妍以無敵姿態，憑藉阿爸分畀佢嘅293億元人民幣身家，位居榜首。至於排名第六、飲食集團俏江南嘅太子爺汪小菲，身家有23億元人民幣。大家識佢唔係因為佢有錢，而係佢同台灣女星大S閃電結婚，上咗N日娛樂版頭條。