公民黨大狀湯家驊嘅地區議員辦事處月初搞咗個深圳一日遊旅行團，諗住同班街坊開心玩番日，點知有參加者事後投訴，話行程中去咗一間珠寶店，喺好離奇嘅情況下，誤買咗幾千銀嘅懷疑假貨，要湯大狀出頭。香港堂堂資深大狀帶團北上都中招，大家真係要醒定啲。
暈陀陀買四千元貨
投訴人梁生話，當日同40幾個團友參加咗湯大狀呢個88蚊超值團，當佢哋去到深圳南山區一個商場一家賣玉石珠寶嘅舖頭時，佢同朋友行入去睇睇。梁生話，唔入猶自可，一入去即刻被店員請咗入一間黑房，叫佢哋望住牆上一啲寶石。
據梁生講，唔知點解佢哋望住嗰啲珠寶折射出嚟嘅古怪光線約10分鐘後，兩人即時暈陀陀，後來就用4,000元人民幣，買咗近20件首飾。
梁生同朋友事後覺得唔對路，返港後即刻去當舖驗吓堆首飾，發現全屬假貨。
梁生諗起間舖頭講過，如有不滿可以去佢哋喺香港一間國貨公司嘅攤位退錢，於是即時撲去諗住要回水，又發現個攤位根本唔存在。梁生最終去埋差館報警，當值差人同佢講「我哋冇興趣處理呢樣嘢」。梁生話惟有向消委會求助，消委會就叫佢搵番湯大狀幫手，因為湯大狀係立法會議員喎。
湯大狀接到呢宗投訴後，即時派助理專門跟進，並去信當日合辦呢個團嘅旅行社，要求旅行社處理梁生投訴，避免類似事件重演。旅行社接信後回覆湯大狀，話已與涉事店舖聯絡了解，得到店舖同意退貨同換貨，又話如果梁先生有需要，可以派人去深圳關口，陪梁生去舖頭退貨。
湯大狀覺舖頭古怪
湯大狀話，其實當日都覺得嗰間舖頭怪怪哋，佢同帶團嘅人諗住陪梁生同朋友入去時，卻被店員拒於門外，只准梁生同佢朋友入去幫襯。
梁生就話，對當日「暈陀陀」經歷猶有餘悸，都唔知去唔去深圳換貨好，「上到去，都驚會唔會真係換到貨，即使換到，又驚會俾人打一身」，仲話經過今次，以後都唔敢參加類似旅行團喎。
mailto:[email protected]