以為投資銀行界一片好景，原來據稱近年銳意擴張的英國第二大銀行巴克萊卻全球裁減數百名員工，本港亦有數十人被迫食無情雞，年終花紅能否保住，仍不得而知。巴克萊當然並非看淡前景，旺市炒人說穿了，其實是自食其果。
從業員薪酬福利現泡沫
這間英資大行，憑2008年奮勇買入雷曼部份業務，海嘯後四出高薪挖角，現時英國業務只佔三分之一。雖則大規模裁員，但聞說巴克萊暗中又計劃大規模招兵買馬，這種做法，又豈止巴克萊。有經驗的Banker人工大升，瑞銀眼見勢色唔對更公開指出，行內從業員薪酬福利已經出現泡沫化，這無非是投資銀行自作孽。
諱於公眾不滿，大行雖已減少現金花紅比重，兼遞延至少兩、三年分期發放，但員工底薪仍然高得驚人。為求搶閘盡快開單，有經驗有網絡的從業員常被加一倍底薪挖走。行業重視主從關係，請一個部門主管，或交易枱「阿頭」，就要連同其手下一同聘用，變相出現買豬肉搭豬骨，變相把競爭對手成張枱甚至係成個部門撬走。
又據聞某大投行去年由中環遷往九龍站，為照顧居於港島區的天之驕子，特意安排穿梭巴士由中環接載過海返工，一日幾班往返港九方便開會，西隧真係要錫晒佢。今年稍後進駐九龍站的另一大行，據報亦會有樣學樣。
大行買員工怕，他們最擔心是具備本港加埋內地客戶關係網絡嘅私人銀行家被挖走。間間銀行都話要擴展私人銀行業務，巴克萊1個三至五年經驗嘅私人銀行中層，每星期至少收到兩、三個來自獵頭公司來電，底薪大加之餘，部份更願意提供對分佣金條款。獵頭族長老告知，呢種情況在內地有過之而無不及，中資內銀在貸款政策被迫收緊下，更積極拓展非利息收入尤其個人及富人理財業務，長老更話人才市場起碼旺埋成個春天，即係傳統攞完花紅較腳旺季。
胡孟青
獨立股評人