有幾多人相信緣份？我並不。去年〈蘋果波經〉負責人邀約在世界盃期間，每星期寫一篇文章，答應是因為鍾意睇波，覺得好玩；怎知，世界盃過後，負責人約食飯原來又來邀稿，希望可以在新的球季，可以維持每星期一稿。
這一次不同上一次，世界盃前後才一個月，寫盡都係5篇，輕輕鬆鬆；但係一個球季，講緊10個月時間，即是一寫就10個月，那種無形的壓力把我壓得透不過氣來。但一想到，「噢！我可以同潘源良做專欄鄰居？！」哈哈！我的虛榮感就即時急升，腎上腺素急升到，連隨向負責人點頭說好，連稿酬都忘了問。
怎知第一期出街，咦！點解冇潘源良？查詢後答案竟然係：「啊！阿潘要拍戲，告假一年，唔講波唔寫波呀！」有冇搞錯，一心一意為做阿潘鄰居，搬咗入嚟至發現阿潘唔再住喺度，係咪玩？！也不能怪任何人，成件事都係自己一廂情願。
千萬不要誤會我與現時的對面單位Keyman有任何過節，只是你們有所不知，我鍾意睇阿潘寫足球專欄，鍾意到真係剪低貼在辦公室的枱上，得閒嗒吓，越嗒越有味！因為對同一場足球賽事的感受，他能寥寥數筆便把我內心說不出的滋味寫出來。
豈料到幾個月前，潘源良卻找上門，邀請我為他的電影《出軌的女人》客串一角，我真的只係聽潘源良三個字，就連角色、片酬、組數等基本需知大概未問的情況下便答應了，是不是不可置信？我不是一個演員，阿潘竟然想到用我，無法解釋，惟有說這是緣份。
同樣在數月前，有一個新工作找上門，由於當時整個計劃的構思要保密，很多細節尚未可以完全透露；也因為自己事忙，即使想答應都要先完成手上的工作才可，是以一直拖住。直至踏入2011年，事情明朗化了，有趣的是，當中原來有Keyman的參與，萬料不到《蘋果》把他許配給我做鄰居，新工作安排亦可以與他同場遊戲，哈！這次不是緣份是甚麼？
文：盧覓雪