坊間有好多新年運程書，最早嗰本，大約在九月份已在報攤出售，而每年最遲出版，有托大之嫌，好似唔想同人爭市場嗰本，就在每年十二月中左右先至面世，以書論書，報販話呢本可能係最厚，最貴，但又最好賣嘅ｎ年運程書，正是「如非有料，豈敢最遲！」咁有信心嘅作者係邊個呀？
作者自己介紹：「我係李居明，一九七七年浸會學院傳理系畢業，做過記者（信報）、電影編劇、電影公司宣傳，旁及風水術數，後來發覺寫咗幾個劇本都冇人願意投資拍戲，索性專心鑽研風水算命，近二十五年來在呢方面搵錢更多，於是又想番回饋藝術，寫吓劇本，點知寫寫吓，八個月之內，寫咗三個，因自小聽粵曲長大，將劇本配上自創歌詞，就成為粵劇，第一個上演嘅劇本就係「蝶海情僧」，兔年年初三（二月五日）在新光戲院首演。」
李居明搞粵劇，索性自己投資，與鳴芝聲劇團團長劉金耀合作，請當紅反串小生蓋鳴暉做情僧，擔綱演出，新年演五場，戲票已賣去九成，剩番一啲後座票。據李居明講，劇本寫完之後，曾將故事告知北京陳薪伊導演（作品有京劇「梅蘭芳」、「袁崇煥」，話劇「商鞅」，黃梅戲「徽州女人」，兒童劇「紅領巾」），陳導演好鍾意個故事，與北京京劇院梅蘭芳劇團團長李宏圖合作寫成京劇版；另外有越劇王子之稱嘅趙志剛聽到，又話要改編成越劇，自己做情僧。結果呢，杭州越劇《蝶海情僧》在一月二十七日杭州首演，京劇在二月十四日北京首演。一個劇本，三套曲詞，在北京，香港，杭州同時在新年前後出現舞台，可謂少有，左丁山根本未曾見過以往有類似事情。
此晚李居明、蓋鳴暉在陸羽介紹劇情，講到王子被貶為僧人吃素，不近女色，偏偏在瘟疫災區賑災，遇上有體香奇女子，破了情慾之禁，之後又誤吃人肉，犯了大忌大禁，由此產生人性衝突，矛盾叢生，結果如何呢？留番睇戲至講！蓋鳴暉話廣東與香港係粵劇發祥地，但係此古老文化面臨淘汰危機，粵劇演員自覺責任重大，佢話現在有好多學生願意學戲，但偏偏缺乏觀眾睇戲，租新光戲院前途未卜，租文化中心每日花六萬元，非粵劇團所能負擔，呢個時候有新投資者（李居明）出現，其為天意乎。