創辦九巴嘅雷氏將家族大屋雷生春捐予政府，由浸會大學活化做中醫藥保健中心，雷生春前任業主、雷氏家族後人雷中元噚日出席啟動禮，緬懷兒時生活。
雷中元噚日舊地重遊，帶八方參觀大屋。1934年佢在呢幢雷生春出世，住到10幾歲時先至搬走，因此大屋充滿其童年回憶。據雷中元稱，當年大屋地舖係中醫藥店，樓上三層樓住咗五房人，大家族加埋有成30幾口，十分熱鬧。而環繞屋嘅大騎樓，就係一班馬騮嘅樂園，踩單車、打波子、追追逐逐好過癮。
呢種騎樓係舊時建築特色，地方闊落風凉水冷，家陣啲發水樓望塵莫及，雷中元話後來打日本仔，家長唔准細路出騎樓玩，只能匿喺屋內。雖然雷生春係雷家一個好多回憶同感情嘅地方，但為咗妥善保存呢幢歷史建築物，所以家族一致決定將大宅捐出畀政府活化，日後做中醫藥保健中心，亦可以繼承當初開醫藥館造福人群嘅信念。