申亞撥款一如所料慘敗收場，雖然呢個結果係意料之內，不過奉命晒馬嘅左派社團都冇偷懶，噚日仍然吹雞到立法會外撐申亞，最後一分鐘仍然交足戲，十分專業。
多個同鄉會、社團聯會噚日中午時分陸續去到中環埋位，一名撐場人士透露，上頭有指示，每個社團要召集100人到場，所以噚日閒閒哋有600、700人晒馬，不過八方思疑呢個數字有頗多水份，因為現場所見，數人頭最多200幾人，即使計埋較外圍坐在一旁嘅街坊，相信最多300人左右。
雖然人數同目標有距離，不過撐場者好熱情嗌口號，人人七情上面，個個出盡全力，搞到八方都擔心民建聯臨場受影響而轉軚，幸好民建聯今次唔敢逆民意，申亞大龍鳳終於收檔，天下太平。