政府向商界伸手叫捐錢嘅關愛基金，噚日喺柴灣青年廣場舉行咗第一場諮詢會，有百幾人出席，台下有17人發言，主要係嚟自社福界人士，一心諗住收多啲公眾意見嘅基金督導委員會主席唐唐，睇嚟收穫認真有限。
發言者講咗唔少家吓低下階層同弱勢社群面對嘅生活困難，其中有位上咗年紀嘅太太同唐唐講私樓租金貴，頂得好辛苦。
唐唐反問佢點解唔申請公屋，太太答佢已經排咗兩年，唐唐嘅反應係平均輪三年，好快輪到你！呢一幕十足十古時皇帝問貧苦百姓何不食肉靡，呢位太太對高官講咁多嘢，真係嘥氣。
煲呔去年宣佈成立關愛基金，多個富豪響應捐款，但原來至今仍然係「口數」，要待政府開設賬戶，富豪入咗錢，先知道實際籌到幾多錢，目前未有捐款數字。