"新特蘭北軍勝發水「紐」"
一名業主近日為港島區千萬元豪宅收樓，但內裏滿目瘡痍。這類外觀貴氣、又有露台、豪華會所嘅發水樓，豆膶咁細值唔值成千萬，真係見仁見智，不過若要窮一生積蓄，仲俾一啲你我都唔識嘅蚊型發展商耍一輪成肚氣，究竟係自己眼光差冇睇清楚合約，定係有人存心搵笨，真係要事態發展落去先知，買錯樓買貴樓有時可以係冇taketwo。賭波唔同，有啲球隊輸完睇錯可以跟進，今周重心放喺新特蘭喺東北大戰低紐記，紐記陣容較華麗，有星級「發水紐」之感，故演出有時價之弊，打得好可以大捷，否則大敗亦是常事。新特蘭上周遣半力英足盃輸畀甲組諾士郡，大可將之賽績抹去；唞咗超過一個禮拜，周日「夫添」會有唔同演出。碰啱紐記最平實、中場掃蕩命脈迪奧迪要停賽，失波可以預見，今場一於冷敲主隊[-1]及入球「大」。
"熱刺南兵破數據降魔"
講開講埋禮拜日另一場英超重心，我一向少信歷史數據，也懶理熱刺近10年未贏過曼聯，只知今季熱刺贏盤贏到你唔信，歐聯未開番，班波一心一意打聯賽更強。呢隊波又係季初睇錯過，以為佢哋兼顧唔到咁多戰線，但打起個加里夫巴利，中前場人腳充裕任舞；又有今屆英超最佳收購之一雲達華治健健康康，主場仲有受讓，直取單W有2.67倍加入球「大」。紅魔今屆都破數據，作客狂失分，近績勁只因對手弱，整體實力如傳統列強車仔及阿仙奴減弱，讓唔起！
"黑池不負厚愛再謀爆"
哈哈，愛隊黑池近期喺本欄講兩次都輸，話過點都堅持長跟，周中返主場「夫添」打紅軍，又贏2:1，我喺擂台都貼中，波膽有12倍，唔通呢班波唔再益周末捧場客？英超今屆亂局，中下型班場場都係護級戰，唞一唞今周佢哋作客到另一升班馬西布朗；後者6連敗氣勢全無，莊家竟然開出主W得1.72倍，但黑池近3戰聯賽作客有爆冷勝史篤城同新特蘭紀錄，士氣正盛；相反對手已講明棄正選龍門卡臣，今季首次重用邁希爾，隱憂大。同一策略，博一注3.9倍客W加入球「大」；博冷，本欄從不手軟！
"二線波捧伊朗白禮頓"
新年前後，英國波密集式向球迷洗腦，你疲我疲，賽果如同天氣一樣，大放冷氣；周中飯局，與財經界名人同評馬專家聚首，大家齊笑說波馬股也難測。其實喺亂局中最重化繁為簡，鎮定行事便可；既然英超難賭，何不多作壁上觀，齋睇捧自己愛隊夠過癮，盡量避開好似今周曼城車仔嗰啲雞肋W同[-1]。二線波熱門，周六推介兩場，亞洲盃伊朗贏北韓，同英甲王白禮頓炒彼德堡，想住得開心，唔一定要住蚊型一手樓；想贏錢，唔一定要夾硬賭英超先夠貴氣嘅。
"拜仁史浩克下半季可長追"
德甲重開，好友鍾意賭冠軍賠率，大包圍非多蒙特以外強隊，謀下半季大逆轉；計逐場賭，我也建議大家追拜仁同史浩克，尤以後者，估計下半季必上番前6，今晚深夜迎漢堡，試吓一注[-1]無妨。
蘋果波神
語錄：今屆英超難賭，何不減注，向其他二線波埋手，冇得睇，唔代表收錢唔過癮喎！