香港政治人組黨熱潮方興未艾，葉劉將匯賢智庫轉型，拉埋史泰祖醫生、田北辰成立新民黨，退出公民黨嘅張超雄就構思組織工黨，八方近日聽到小道消息，指社民連季詩傑曾接觸其他黨派，當中包括張超雄，探討一齊組黨嘅可能性，由於社民連似要分裂，所以阿季動向幾受關注。
冇同季詩傑接觸
阿季同八方講，冇同張超雄傾過搞工黨問題，又話目前仍會與陶君行共進退，「阿陶去邊我去邊」，強調日後去向要睇社民連搞成點。張超雄亦話冇接觸阿季，更同八方講，籌組工黨比想像中多阻滯，與民間團體討論日後合作空間或方式時，好多團體對「工黨」呢個名稱有戒心，對擬組織嘅工黨代表性好多問題。
張超雄承認工黨呢個名可能令人卻步，因為香港幾無藍領工人，如果組成工黨，一般人比較難理解代表邊啲工人，佢話其實心目中新政黨係要為弱勢社群、最容易受剝削嘅人發聲，所以現時對是否組織工黨有新諗法，「如果有其他更好嘅名，我哋可以考慮」。
工黨難產，張超雄稱估計最快年中先有眉目下一步點樣走，今年區議會選舉不可能出選，至於能否派人參選明年嘅立法會選舉，佢話暫未有諗法。