性格小器嘅煲呔，面對今日申亞敗局注定，噚日在立法會答問大會發爛渣，怪責民建聯今次保皇不力，將政府申亞失敗諉過保皇派不支持，聲言自己被「跣低」同「篤背脊」，仲自比早前喺廣州亞運負傷奪銀牌嘅女子單車手黃蘊瑤，跌低後仲慘遭其他車手兩度輾過，「我哋見到運動員跌落地，俾車碌過，整傷埋胸骨，都唔怕，都繼續去，我哋同事都會一鼓作氣，希望最後分鐘能夠說服各位議員」。
民建聯議員全部扮儍
煲呔噚日獲支持申亞嘅「經濟動力」梁劉柔芬鬆章，回答有關申亞問題時長篇大論，不點名向曾在立法會提出動議、要求政府申亞嘅民建聯翻舊賬，指民記去年初在東亞運後，好熱烈咁促請政府考慮申亞，推政府去馬。
點知煲呔講到呢處，矛頭一轉，「雖然我哋進行（申亞）呢個過程中都俾人跣低過，背脊周圍都係窿，但係我哋亦見到，運動員跌落地，俾車碌過，整傷咗胸骨，都唔怕，都繼續去嗰陣，我哋同事都會一鼓作氣，希望最後分鐘能夠說服各位議員」。
煲呔自稱被跣兼遭人篤背脊，民記一眾議員會後全部扮儍，冇人認數。民記黨團召集人葉國謙稱唔會對號入座，「我又唔覺佢講緊我哋喎」。主席譚耀宗則話：「唔知佢講緊邊個呢？我哋冇篤人背脊，俾人篤就有！」又繼續同煲呔扮friend，表示今個月22會應約到特首粉嶺別墅與煲呔BBQ，「去燒嘢食啫，又唔係燒炭」。
新聞稿隱瞞煲呔牢騷
前日決定反申亞嘅自由黨亦係跣煲呔疑兇，該黨主席劉健儀話：「我唔知邊個跣佢、篤佢，我相信佢如果與其作出呢啲批評，不如睇番自己點解準備工夫咁差先啦。」申亞不獲民意支持，原因高官心知肚明，煲呔發爛渣賴人亦無補於事，而呢單跣人風波，更引發政府新聞處竄改事實醜聞。
噚日煲呔在立法會一字一句控訴「進行（申亞）呢個過程中都俾人跣低過」，但新聞處晚上發出官方紀錄，卻變成「進行（申亞）過程之中也跣低過」，無故消失咗「俾人」呢兩個字。官方新聞稿嘅意思，同煲呔原話完全唔同，明刀明槍隱瞞真相，好離譜。
mailto:[email protected]