中國喺亞洲盃由天堂跌落地獄！贏科威特旗開得勝後，點知教練高洪波禮拜三玩變陣，胡亂換人搞到最後被迫打少個，吞東道主卡塔爾兩蛋。最慘分組賽最後一仗周日遇剋星烏茲別克，贏唔到就好大機會出局，呢鑊高洪波真係企喺懸崖邊，隨時碌落山。
國足亞洲盃A組初嘗甜頭後，高主帥諗住出奇招，派曾誠代替正選門將楊智，又收起上場踢得唔錯嘅前鋒楊旭及防中趙旭日，用曾喺昆士柏流浪友賽打出火而聞名嘅郜林，夥拍于濤搵食，結果就俾卡塔爾前鋒尤斯夫阿里分別喺27同45分鐘入咗兩個靚波。其實喺兩球波之間，高洪波做咗第一個無厘頭換人，搵楊旭入替郜林，諗住轉打穩守突擊。喂，大佬呀，未失波就話穩守啫，家輸緊喎。
唔止咁，高生58分鐘用周海濱換于濤又係敗筆，事關周海濱做後備做得多，落場後同隊友「零默契」，中場混上加亂。最慘係3個換人名額用晒後，趙鵬後段受傷，無端端要打少個，點追呀！
其實高洪波喺09年4月任教時都唔差，上年捧過東亞盃；但今次就有信心危機嘞！賽後佢話「唔夠運」，輸第1球就算有意大利鋼門保方都救唔到，咁嘅藉口都諗得出，高生果然夠高。
下場要贏烏軍兩球
形勢上中國同卡塔爾無論積分同得失球差都一樣，下場至少淨勝實力唔曳嘅烏茲別克兩球先篤定出線，打和同輸波都要睇科威特對卡塔爾嘅成績。不過，兩場波輸晒嘅科威特，隨時「放水」畀卡塔爾，所以今次自己真係要努力頂住呀！我求大俠記得，上屆中國就係喺兩大主力鄭智同李瑋峰停賽下，分組賽最後一仗以0:3不敵烏茲別克，首次唔能夠晉級。今次一樣冇咗停賽嘅曲波同受傷嘅趙鵬，下場再遇死敵，高洪波真係要醒醒定定啊！
