噚日大新銀行（2356）提早同傳媒團年，席間講到香港人嘅驕傲─華叔（司徒華），真係唔講唔知，原來大新執行董事藍章華細個嗰陣俾華叔教過，藍生同佢啲家姐細佬妹一門五傑，都係讀司徒華做校長嗰間葛量洪校友會觀塘小學嘅，所以佢哋向來都好敬重華叔o架！
藍董話，喺啱啱過去嘅周末，教協喺葛量洪搞咗個追思會，佢都有出席，佢話華叔當年嘅循循善誘、諄諄教誨，佢一直都冇忘記，而且佢哋5兄弟姐妹同華叔都好投緣，到佢哋大個咗，都同華叔keep住有聯絡o架！
感慨完之後，大家就要向前望！藍生話，噚日飯局其實仲想同大家拜個早年，佢哋分行嘅服務時間，會喺春節前幾日（1月25日至2月1日）延長至夜晚7點，仲因應新春同大家抽吓金擺設、大利是同免費遊日本嘅機會（呢個當然要攞指定金額嘅新錢去開戶先得啦！）……藍生咁盡心盡力做好份工，華叔在天之靈應該好安慰喇！