網上購物呢幾年越嚟越普及，但敏妮喺呢一方面就仲係好保守，買嘢唔摸過、check過就畀錢，硬係感覺唔係幾好。
令敏妮對網上購物仍然卻步，其實仲有一個原因，就係始終對網上保安系統唔係咁信任，又怕養成網上買嘢嘅習慣，好容易會使大咗但係自己都唔覺。
倘遭盜用亦損失有限
不過，家陣好多嘢透過網上做方便好多，訂書買機票呢啲唔使講，簡單如嚟緊農曆新年想搵部戲睇，如果喺網上買飛，就唔使排長龍慳番好多時間。
為咗「克服」網上消費嘅問題，敏妮的起心肝，去銀行出咗張預付卡。
張卡同一般VISA冇乜分別，唔同嘅地方係，一般信用卡係買完嘢先找數，預付卡顧名思義，畀咗錢先消費，有啲似八達通卡。出卡時可以揀儲值額，一般100至5000蚊，出卡後一日就用得。
敏妮計過，最常用都係網上訂戲飛，頂多會買書同download啲iPhoneApps，除此以外，都好少有機會透過網上消費，所以只係出咗張1000蚊嘅預付卡，當必要時看吓門口，就算俾不法之徒盜用，損失都係非常之有限，又唔怕喺網上購物時唔小心使大咗。
可作網上購物 又可當禮物
敏妮爸爸媽咪係老一輩，唔慣用信用卡，但就嚟過年，老人家總要辦吓年貨，家陣百物騰貴，敏妮唔鼓勵佢哋留太多現金喺身，諗到不如出張預付卡畀佢哋。
事關係畀咗錢先消費，所以張卡可以當禮物，只要持卡人簽個名喺卡後面就用得。
點知兩個老頑童原來仲醒過敏妮，話去銀行做定期存款時，銀行經理已經介紹過預付卡畀佢哋，晨早已經想敏妮出番張畀佢哋咁話。
溫敏妮
http://wanmanli.com/blogs/