社民連掟蕉已成特首答問大會指定動作，如果唔出蕉，恐怕煲呔以至一般市民都唔收貨。長毛噚日有備而來，帶咗個地拖同海綿「雙截蕉」入場，前者諷刺政府對做全民退休保障計劃一拖再拖，後者就招呼煲呔，果然長毛好快出蕉，隨即被帶離場。
年宵將至，社民連應該會在維園再賣「雙截蕉」，長毛噚日出手，真係一蕉兩得，令「雙截蕉」又曝光，對促銷應有幫助。社民連似乎唔忌諱抽水，陳偉業噚日發言時，話辱罵高官多年，從未被叫收口，近日講多兩句有人去新花都、涉嫌醉駕，卻被人叫停，言若有憾咁樣。
陳偉業喺特首答問大會暗批陶君行不應要黨員封口，令無數人側目。黨爭內鬥係家事，與答問大會無關，陳偉業做議員多年竟然無分無寸公私不分，真係低水平。