一句「河水不犯井水」困擾港人20年，國務院港澳辦主任王光亞繼承阿爺愛譬喻嘅傳統，早前一句「井水不犯河水」拋到班港區人大政協騰騰震，一個二個高呼「最愛河水」，都唔怕肉麻老土。
「其實都係中國水」
當全人類爆頭諗呢句黑洞咁深嘅深層次意思時，北京大學法學院教授兼基本法委員會內地委員饒戈平，竟然話河水井水譬喻根本唔能夠準確表達一國兩制意義，聽到八方巧京京（好驚驚）！
北京「護法」點會以下犯上咁冇分寸呢？佢噚日嚟咗香港，話河水井水譬喻只能夠講出兩者互不干擾，講唔出相同嘅地方。「護法」話河水井水其實都係中國水，可能有相連同滙合嘅地方，講到呢度，八方已經一頭霧水。
饒護法又不停loop一國嘅重要性、唔畀你自主係為你好、冇咗中國經濟香港一定死諸如此類，中心思想，八方估計係：河水可以犯井水、井水唔可以犯河水、井水其實都係嚟自河水，無咗河水，何來井水？